فلسطيني ممنوع تعيش
قالولك اسكت تحكيش
انت خلقت للتلطيش
للحواجز للمعابر للتفتيش
من الضابط للشاويش
فلسطيني ممنوع تعيش
فلسطيني ممنوع تثور
و مش مسموح تقول مقهور
اياك تطالب بحقك
اوعك بيوم تشوف النور
ممنوع تجدد هويه
ممنوع تجدد بسبور
فلسطيني و بدك تتعلم
هذا شي ضد الدستور
فلسطيني لازم تتألم
من دون ما يشوفك دكتور
فلسطيني ممنوع تتظلم
و لا يطلع بجناحك ريش
فلسطيني ممنوع تعيش
فلسطيني بكل المطارات
اسمك بالاحمر مكتوب
كتبوا علي جبينك مطلوب
لازم تتوقف ساعات
مذنب او مندون ذنوب
و يتوجه الك اتهامات
انك سبب كل الحروب
كأنو بسببك الحق مات
و العدل بارضك مسلوب
و كأنك سبب النكسات
و كل ازمات الشعوب
و كأنو بسببك مجرم فات
على جنين بلحظه الغروب
و دبح صبيان و بنات
و عجز على امرها مغلوب
مع انو الحقيقه واحدة
انا الي بالدنيا ضحيه
عملتوني ماده للغنى
و قضية للي ما عندو قضيه
انا الي راسي ما إنحنى
بوجه الريح القويه
انا الي شعبي صمد
بغزة والضفة الغربية
انا الي شعبي انتفض
و بحجر حارب دوريه
و اليوم و بكره و للابد
عنا كلمه واحده وهي
فلـســطين عربيـــــة
فلسطيني حقك تعيش
الخميس 6 نوفمبر - 19:33
