يمه .. تكفين اسمعيني

قصيدة رائعة أبكتني

يمه تكفين ارجعي

يمه .. تكفين اسمعيني

يمه بسألك شي .. جاوبيني

هو صحيح اللي مات

داخل القبر يصير حي

يمه تكفين ارجعي

يمه .. أسمع أنا صوتك

كل يوم اسمعه

وإذا حاكيتك هاوشوني

قالوا انسي

روحي يالله العبي !!

يمه تعالي ارجعي

والله خلاص بسمع كلامك

ما أخرب ألعابي

وان قلتي يالله

روحي نامي

أروح حتى ماتزعلي

يمه تكفين ارجعي

اليوم حطت لي المديرة

نجمه من فوق جبهتي

يمه سمعتها تقول

مسكين هالبنت صارت يتيمة

قالت لها أبله منيره

مسكينة توها صغيره

وش كانوا يقصدون

يمكن عشاني صرت عاقله

ولا عشاني دايم اسرح

يمه تكفين ارجعي

يمه مريولي توسخ

ماكان قصدي أوسخه

بس تذكرت انك تقولي

بعد شهرين

بشتري لك لبس ثاني

يمه تعالي اشتري

يمه عرفتي مها

صديقتي اللي معي .. زاعلتني

تقول ماصرت انا أضحكها

راحت تدور غيري

عشان تلقى احد يونسها

يمه تكفين ارجعي

يمه .. يالله خلاص لاتمزحي

يالله قومي

تعالي معي للبيت ارجعي

يمه يمه .. نسيت شي

بقولك ترى بيتنا صار فاضي

ماحد يجينا

وكل اللي فيه انا وأخواني

ليه وين أقاربنا

وين خالتي .. اللي كانت تجينا

يمه تكفين ارجعي

يمه قومي يالله تعالي

تكفين يالله تعالي

ماودي ارجع لحالي

والله خايفه

ترى أمس جيتك مارديتي

حسبتك نايمه

أو أقولك .. خلاص خلاص

انا بجيك بكرى

إذا راحوا من هنا الناس

تكفين يمه بكرى اصحي

تكفين يمه بكرى ارجعي

يمه تكفين ارجعي

والله يحفظ أمهاتكم جميعاً ويرحم من توفيت عنه أمه

أتمنى أن أعرف رأيك في القصيدة ؟

منقول

قصيدة جدا مؤلمة
قصيدة تبكي القلب قبل العين

عندما قرأتها دار في بالي جميع اطفال غزة وفلسطين ككل الذين فقدوا ابائهم وامهاتهم في المجزة الكبيرة بل اقصد عرس الشهادة

حسبي الله ونعم الوكيل

مشكوور اخي الحل الصعب على الشعر الرائع والجميل

والله يعطيك العافيه

ننتظر جديدك